Idan aka zaɓe Ni kamar an zaɓi Taɓawa ɓalewa ne, zan yi aiki kamar yadda ya yi a yankin Arewa – Atiku

Tsohon mataimakin shugaban kasa Atiku Abubakar, dan takarar shugaban kasa na jam’iyyar PDP, ya ce magoya bayan jam’iyyar a yankin arewa maso gabas suna da damar sake fitar da wani Tafawa Balewa ta hanyar zabe shi a 2023.

Atiku bubakar ya bayyana haka ne a filin wasa na Pantami dake Gombe a lokacin da yake jawabi ga magoya bayansa a lokacin kaddamar da yakin neman zabensa a jihar.

Ya ce an dade da zama shugaban kasa a yankin kuma takararsa wata dama ce ta samar da wani shugaban kasa ta hanyar jefa kuri’a ga PDP.

“Yawancin ku ba a haife ku ba a lokacin da Marigayi Firimiyan Najeriya, Sir Tafawa Balewa yake mulki; yanzu kun sake samun damar fito da Abubakar Tafawa Balewa a cikina,’’ inji shi.

Malam Abubakar ya ce zuwansa jihar Gombe gida ne, kuma zai tabbatar da cewa jama’ar jihar sun samu karfin gwiwa tare da tallafa wa ‘yan kasuwa don samar da ayyukan yi idan aka zabe shi a 2023.

“Mun yi alkawarin fadada sana’o’inku ta yadda za mu samar da ayyukan yi ga matasan mu maza da mata; mun kuma yi alkawarin sake farfado da madatsar ruwan Dadin Kowa domin samar da wutar lantarki da noman ban ruwa,” inji shi.

Dan takarar shugaban kasa na PDP ya ce za a ba da fifiko kan tattalin arziki da noma tare da sake gina tituna a yankin Arewa maso Gabas domin bunkasa kasuwanci.

Mista Abubakar ya kuma yi alkawarin magance matsalar rashin tsaro a yankin Arewa maso Gabas tare da tabbatar da cewa an dawo da zaman lafiya domin samun ci gaba cikin sauri.

Gwamna Udom Emmanuel na Akwa Ibom wanda shi ne shugaban kwamitin yakin neman zaben shugaban kasa na PDP ya ce Abubakar ya kasance mafi cancanta a cikin ‘yan takara.

Mista Emmanuel ya bayyana cewa zaben Abubakar zai mayar da kasar kan turbar ci gaba da inganta rayuwar talaka.

Gwamna Aminu Waziri Tambuwal na jihar Sokoto da kuma Darakta Janar na kungiyar yakin neman zaben shugaban kasa na jam’iyyar PDP sun yi kira ga magoya bayansa da su zabi PDP a 2023.

Mista Tambuwal ya ce gwamnatin Abubakar za ta farfado da tattalin arzikin kasar domin tabbatar da cewa kasuwanci da masana’antu sun zama ginshikin amfanin jama’ar Gombe.